Ukol sa Pakikinig

Nang tanungin si Dr. Benilda Santos, isang makata at propesor sa Filipino sa kolehiyo, kung saan niya nakukuha ang mga paksa niya sa mga tula, narinig kong isinagot niya: "Kung titingnan mo lang ang isang bagay nang mas matagal pa at may pasensiya, dahan-dahan 'yang bubukas at mangungusap sa iyo."


Tanong:  Nagawa mo na bang tingnan nang mas matagal pa sa karaniwan ang mga bagay na lagi mo nang nakikita?


Narinig kong nasabi ni Dr. Stephen Covey, may limang antas daw ang Pakikinig o Listening.  Ang pinakamababang antas: Ignoring o Pagwawalang-bahala sa Naririnig.  Pangalawa: Pretending o Pagpapanggap Lamang na Nakikinig.  Pangatlo: Selective o Pakikinig Lamang sa Ibig Marinig. Pang-apat: Attentive o Pakikinig sa Lahat ng Sinasabi ng Nagsasalita.  At ang pinakamataas: Empathic o Pakikinig sa Lahat Pati Na sa Hindi Sinasabi ng Nagsasalita.


Tanong:  Kailan ka huling nakinig nang Attentive o Empathic?


Sa pelikulang Dead Poets Society, narinig kong binanggit ni Mr. Keating ang "Carpe Diem" o "Seize the day" o "Huwag mong pakawalan ang sandali".  Sinabi rin niyang "Suck the marrow out of life." o "Simutin mo ang bulalo ng buhay."


Tanong:  Wala ka bang pinalalampas at sinasayang sa mga nakasasalamuha mong mga mumunting biyaya ng buhay?


Sa dulang Immortal Diamond, nang bigkasin ang tulang God's Grandeur ng Heswitang si Gerard Manley Hopkins, narinig ko ang linyang  "The world is charged with the grandeur of God" o "Tigib sa rangya ng Diyos ang daigdig".


Tanong:  Napapansin mo ba ang rangya ng Diyos sa daigdig?


Sunggaban mo sana ang mga araw mo at huwag pakawalan.  Tumingin ka sanang mabuti, at nang may pasensiya, upang bumukas ang mga bagay sa iyo at mangusap.   Makinig ka sana nang hindi nagwawalang-bahala, hindi nagpapanggap, hindi namimili lang ng gustong pakinggan, kundi makinig nang masidhing-masidhi upang masagap mo lahat ng sasabihin at pati na rin ang mga hindi sasabihin.   


Marami sa mga pinahahalagahan kong paninindigan ngayon ay mga nabanggit lamang ng mga taong pinakinggan ko.  At madalas, binanggit nila ito hindi bilang paksa kundi bilang isang munting hirit lang. Kagaya ng mga napakinggan kong hirit nina Dr. Benilda Santos, Dr. Stephen Covey, Mr. Keating at Gerard Manley Hopkins.  Mabuti na lamang at nakikinig ako noong mga sandaling iyon.


Maraming nagsasabing ibig nilang sumabay sa bayan ngunit wala namang ginagawang pagpapalawak o pagpapalalim ng sarili.  Kung gusto mo talagang sumabay sa bayan, mahihiya kang walang gawin upang paunlarin ang iyong sarili. Gugustuhin mong tumingin at makinig.  At tumingin at makinig nang mabuti.  


Dahil sa anumang sandali, maaaring masagap mo ang magiging pinakamahalagang paninindigan mo sa buhay -- mula sa anuman at kaninuman, mula sa mga sasabihin, mula sa mga mumunting hirit, mula sa mga mensaheng hindi binibigkas.  Kaya mahalin mo sana ang sarili mo at MAKINIG KA.


Gaya nga ng sinasabi sa isang awit-pangmisa noong bata pa ako, na matagal ko nang kinakanta ngunit kailan ko lang totoong pinakinggang mabuti, "Minsan lamang ako daraan sa landas na ito.  Kaya't anuman ang mabuting maaaring gawin ko, nawa'y huwag kong ipagpaliban."


Namamaos at nauubos din ang mga taong laging bumibigkas.  Ngunit ang mga taong laging nakikinig, hindi kailanman nasasaid.


- inihanda ni Ronan B. Capinding